انتشر فى الأونة الاخيرة عبر مواقع التواصل الاجتماعى كتير من المنشورات والفيديوهات اللى بتمدح الأب والأم من قبل الأبناء
بس السؤال هنا .. احنا بنعمل بالمنشورات والفيديوهات دى قبل مانزلها؟! ولاهو مجرد تقليد اعمى للغير ؟!
عارفين فعلا قيمة الأب والأم فى حياتنا،حتى لوإحنا شايفين من وجهة نظرنا إنهم قاسيين علينا.؟!
ولاإحنا بنطلع وبننزل بالمؤشر حسب حالتنا المزاجية؟!
عملوا لنا حاجة إحنا بنحبها هايبقى رد فعلا إيجابى !!!
عملوا لنا حاجة مش على هوانا هايبقى رد فعلا سلبى !!!
وفى كلتا الأحوال منشوراتنا كلها إيجابية تجاه الأب والأم وخاصتا بعد وفاتهم.
وبنبقى عارفين قيمتهم كويس قوى على السوشيال ميديا وكأن بر الوالدين انحسر بين كلمتين(السوشيال ميديا) والواقع عكس ذلك تماما.
* نركز قوى فى الحتة الجاية دى :-
فى كتير من الأبناء اول مايوصلوا لسن الإدراك بيتبعوا سياسة غريبة قوى مع الأب والأم(أحمر عينى وأدبحلهم القطة)عشان يعملوا حسابى فى الصغيرة والكبيرة ويحترمونى فى غيابى قبل حضورى، وبكده هاتبقى حياتنا هادية وجميلة ، وأنزل منشورات وفيديوهات فى مدح الأب والأم وبكده اكون أبن بار ، إنت ماتعرفش إنك بكده بتعمل عليهم ضغط مضاعف ؟!!!!!
لوللحظة واحدة تبادلنا الأدوار بدل الأب والأم هانعرف مدى المعاناة والتعب اللى بيتعبوه عشان إحنا ننجح ، لوغفلوا عننا ثانية واحدة بس ممكن نضيع ، وتخيل فوق كده كمان بيتقوا شرك ، فزودت الضغط عليهم أضعاف ،( ضغط الخوف عليك وضغط الخوف منك )
وبتبقى مبسوط قوى إن أبوك وأمك بيحترموك وإنت من جواك متاكد إنه خوف منك .
فى فرق كبير قوى بين الإحترام والخوف!!!
لوأبوك وأمك عملوا حسابك عشان يتقوا شرك فتاكد إنك إبن عاق .
التوتر اللى بنبقى شايفينه دايما فى الأب والام بيبقى من شدة حبهم لنا وخوفهم علينا وبنفتكر إنها قسوة .
وفى النهاية ... ياترى ... لما يكبروا ابويا وأمى هابقى عكازهم زى ماكانوا سند ليا وأنا صغير ومازالوا سند ليا وأنا كبير؟!!!!
وأخيرا أبوس جزمة أبويا وأمى وهما عايشين قدام ربنا ... افضل بكتير ماابوسها قدام الناس .
يارب تكون رسالتى وصلت .. ولكم منى أرق تحية... والسلام عليكم ورحمة الله وبركاته .
