لما تلبس لبس قِبلى
يبقى تعرف طبع ناسه
عُرفنا ف لبس الصعايدة
كل واحد ليه مقاسه
والمقاس مش طول هدومه
م احنا بنقيسه بأساسه
ابن نااس والاصل طيب
ولا اصله حد داسه ؟؟؟
والاصيل لو فوق رقبته
سيف لايمكن يحنى راسه
يعنى تبقى الروح بتطلع
من جوارحه ومن حواسه
واللى زيك رغم ماله
مايساويش فردة ف مداسه
الخسيس والطبع يغلب
مهما يلمع ف ايده ماسه
كل يوم تنزف جروحه
لوعليها الخلق داسو
واستحالة الاصل يبهت
مهما داق من مر كاسه
يعنى مهما الدنيا تعند
الاصيل بيزيد حماسه
الدهب ساكن والهادى
سايب الرنة لــ نحاسه
ياسر التونى